انا نزلت المظاهرات اليوم وكنت بفكر قبلها بفترة يا تري لو نزلت ولاي سبب مت زي ما بنسمع كل يوم يا تري حيبقي موقفي ايه ؟؟؟ يعني نيتي ايه ؟؟؟ممكن ربنا يعاملني ازاي؟؟؟ وايه اللي ممكن يحصل في كل شيء في حياتي لو حصل ده بجد؟؟؟ مكدبش عليكم كنت خايفة .اول حاجة قلت في نفسي اني مش ححاول اعمل اي اذي لاي حد . يعني مظاهرات سلمية من غير ضرر لاي حد ومحرضش اي حد علي التاني ابدا . بس الفكرة اني نازلة اقول رأيي عشان بلدنا تتغير وتبقي احسن ولان فيه حاجات بجد مش عجباني في حكم الاخوان للبلد . وطلبت من ربنا انه يرجعنا بخير . المهم نزلت وشاركت والتقطت بعض الصور طبعا والفيديو حبقي ارفعهم لكم ان شاء الله . ورجعت الحمد لله وكنت مبسوطة كتير . بس عارفين ساعات الخوف من الموت بالذات ومقابلة ربنا والخوف من الخاتمة بيبقي مفيد لاني حاولت انه تكون عندي نيه خير . وتوكلت علي الله وسألته ان يحميني وتركت الباقي عليه فبقي الحمد لله كل شيء طيب . بس هو احنا ليه مش بنفكر كده علي طول عشان بننسي اننا حنموت فعلا ؟ ولا احنا عندنا طول امل في الدنيا بغير حق . وعلي فكرة صعب جدا موضوع الموت واحنا لسه في رقابنا حاجات متعلقة المفروض كنا نعملها ومؤجلة لبعدين .بس عارفين مهم جدا موضوع النوايا وحسن الخاتمة . ربنا يجعل خاتمتنا خيرا ويحسنها لنا جميعا ان شاء الله
ليست هناك تعليقات:
إرسال تعليق